Children’s Song for World Peace

உலகில் அமைதி வேண்டும் !

(குழந்தைகள் பாடும் அமைதிக்கான பாடல்)

உலகில் அமைதி வேண்டும்- குழந்தைகள் எமக்கு- உலகில் 

எல்லைகள் தாண்டி குழந்தைகள் எமக்கு- உலகில் அமைதி வேண்டும். 

உங்கள் சண்டைகள் எமக்கு வேண்டாம் 

எங்கள் பூமியை அழித்திட வேண்டாம் 

மங்கல வாழ்வு மலர்ந்திட வேண்டும் 

தீங்கின் வேர்களைக் களைந்திட வேண்டும்- (உலகில்)  

போட்ட சண்டைகள் போதும் மக்களே 

போராட்ட முறைகள் மாறிட வேண்டும்

அன்பும் கருணையும் ஆற்றலும் அறிவும் 

இன்பம் செழித்திட இணைந்திட வேண்டும்- (உலகில்) 

அணுஆயுத சண்டை அகிலம் அழித்திடும் 

சினம் வெறி போட்டி தன்னை அழித்திடும் 

காந்தியின் அகிம்சை அகிலம் காத்திடும் 

சாந்தியின் வழியில் புதுவாழ்வு மலர்ந்திடும்- (உலகில்) 

நீதியும் கருணையும் உறவின் வேர்கள் 

சாதியும் செருக்கும் பிரிவின் கூறுகள் 

உறவை வளர்த்து மன எல்லையை மாய்த்து 

சிறகை விரித்துப் பறந்திடுவோம் நாங்கள்- (உலகில்)

-சூ குழந்தைசாமி